1841 წლის გურიის აჯანყებაში გლეხობასთან ერთად მთავრობით უკმაყოფილო თავად-აზნაურობაც მონაწილეობდა, რადგან მთავრობა ფეოდალთა უფლებებს ზღუდავდა, აჯანყებულებს აჭარის მთავარმა ჰასან-ბეგმაც დაუჭირა მხარი. ჩინ-მედლებით მოსყიდული აზნაურები მეფის ჯარის მხარეს გადავიდნენ და გლეხთა შემოტევის მოსაგერიებლად დახმარება სამეგრელოს მთავარს, დადიანს სთხოვეს, მაგრამ დადიანის ჯარი აჯანყებულებს მიემხრო. მეფისნაცვალმა მეამბოხეთა მეკავშირე ჰასან-ბეგი დიდძალი ფულით მოისყიდა და აჯანყება ჩაახშო.