დაბადების თარიღი: 30 ივლისი, 1890
გარდაცვ. თარიღი: 24 მაისი, 1933 (42 წლის ასაკში)
დაბადების ადგილი: ქ. ოზურგეთი.
დაამთავრა კიევის კომერციული ინსტიტუტი 1917 წელს.
სწავლობდა თბილისის კომერციულ სასწავლებელში, სადაც ჩამოაყალიბა მემანდოლინეებისა და გიტარისტთა ორკესტრი; 1910 წელს თბილისში გამართულ მანდოლინაზე დამკვრელთა კონკურსზე პირველი პრემია დაიმსახურა; პარალელურად სწავლობდა კიევის მუსიკალურ სასწავლებელში ვიოლინოსა და კომპოზიციის კლასში; 1917 წელს საქართველოში დაბრუნდა და შეუდგა შემოქმედებით მოღვაწეობას; მის შემოქმედებაში განსაკუთრებული ადგილი უჭირავს ოპერა “ქეთო და კოტეს” (პირველი წარმოდგენა 1919 წლის 11 დეკემბერს გაიმართა, ა. ცაგარელის “ხანუმას” მიხედვით), იგი ქართული კომიკური ოპერის კლასიკური ნიმუშია და დღემდე დიდი წარმატებით სარგებლობს, 1937 წელს ნაჩვენები იყო მოსკოვში საქართველოს ხელოვნებისა და ლიტერატურის პირველ დეკადაზე, სხვადასხვა დროს იდგმებოდა სსრკ არაერთი საოპერო თეატრის სცენაზე(მოსკოვის კ. სტანისლავსკისა და ვ. ნემიროვიჩ–დანჩენკოს სახელობის მუსიკალურ–დრამატულ თეატრში), ჩეხოსლოვაკიაში, ბულგარეთში, პოლონეთში; ოპერის მიხედვით შექმნილია მხატვრული კინოფილმი “ქეთო და კოტე”(1947, რეჟისორი ვ. ტაბლიაშვილი); ასევე ავტორია: ოპერები: “ლეილა” (1922, ცაგარელის პიესის “ლეკის ქალი გულჯავარის” მიხედვით), “ცისანა”(1929, ერთაწმინდელის სიუჟეტზე), სიმფონიური ფანტაზია “ივერიადა” (1925), დამუშავებული აქვს აგრეთვე სამხრეთ–ოსეთში მოგზაურობის დროს ჩაწერილი ოსური ხალხური სიმღერები (1926), ოპერა “ზამირა” (1931, ოსურ ხალხურ თემებზე, დაუმთავრებელი), სიმფონია “აზერბაიჯანი” (1932), საფორტეპიანო კონცერტი (1932), რომანსები; ქართული კომიკური ოპერის ფუძემდებელი.