დაბადების თარიღი: 27 მარტი, 1930
გარდაცვ. თარიღი: 3 მარტი, 2022 (91 წლის ასაკში)

დაბადების ადგილი: ქ. ტყიბული.

დაამთავრა შოთა რუსთაველის სახელობის თეატრალური ინსტიტუტი 1955 წელს.

ბათუმის თეატრის მსახიობი იყო. მის მიერ შესრულებული როლებიდან აღსანიშნავია პოლონიუსი (უ. შექსპირის “ჰამლეტი”), ხარიტონი (პ. კაკაბაძის “კოლმეურნის ქორწინება”), ილარიონი (ნ. დუმბაძის, გ. ლორთქიფანიძის “მე, ბებია, ილიკო და ილარიონი”), ქლესოვი (ავქ. ცაგარელის “ციმბირელი”), ჩინჩახოვი (კ. ბუაჩიძის “ეზოში ავი ძაღლია”), აშუღი (ლ. გოთუას “მეფე ერეკლე”), ტიტიკო (ვ. დარასელის “კიკვიძე”), კალანდაძე (ვ. კანდელაკის “დრო 24 საათი”), შოთა (ფ. ხალვაშის “ვაზის ტირილი”), ბესო (თ. ჭილაძის “ბუდე მეცხრე სართულზე”), ჯანიკო (ა. ჩხაიძის “როცა ქალაქს სძინავს”) და სხვა. კინოში განსახიერებული როლებიდან: სიპიტო – “წუთისოფელი”, დურუ ხუნჯუა – “რეკორდი”, კომენდატი – “უმცროსი და”, არლანი – “მთვარის მოტაცება”, ადმინისტრატორი – “ზღვის მგელი”, კარპე – “სითბო გაუნაწილე”, “მსურველებს შეუძლიათ ჩაეწერონ”, – ბიძინა ფოსტალიონი – “გადაღების ერთი დღე”, ანტიბიო – “ზღვის შვილები”, კაპიტანი – “კაპიტნები”, და სხვა. მისი შემოქმედებითი შესაძლებლობა განსაკუთრებული ძალით ვლინდებოდა კომედიურ და სახასიათო როლების განსახიერებისას. მდიდარი ფანტაზია, გამომგონებლობის ნიჭი, გამორჩეული პლასტიკა, არტისტიზმი საშუალებას აძლევს მსახიობს საინტერესო, კოლორიტული სცენური თუ კინომატოგრაფიული სახეებით გაამდიდროს საკუთარი, შინაარსიანი არტისტული ბიოგრაფია. 2010 წლის 28 ნოემბერს, ბათუმის ილია ჭავჭავაძის სახელობის სახელმწიფო დრამატული თეატრის წინ მისი სახელობის ვარსკვლავი გაიხსნა.

წყარო: მანუჩარ შერვაშიძე – ბიოგრაფიული ლექსიკონი (nplg.gov.ge)